الــبــكـــــــرهـ الــمــســــروقــــهـ ...

[عبدالله بن نور الأسعدي]

بسم الله الرحمن الرحيم



السلام عليكم ورحمة الله وبركاته ... وأتمنى أن تكونوا بأتم صحه وعافيه


هذه القصيده مناسبتها تتضح لكم بعد القراءه ... أتمنى أن تحوز على رضاكم

يقول اللي ليامن قال قوله لولو ومرجان=وألماس ودرر ماهي بلون الزيف مطليه
مغلفها بتغليف القصيده باجمل الالوان=مقدمها من الهاجس لبنت الريح مهديه
سلامي ياصلك ياحرتن تركض بدون عنان=وبعده آتشكر لك وعني بخير مجزيه
والبّس راسك الاصوك من ابيات الذهب تيجان=ونا شاعر وهذا واجب آسويه جبريه
هني اللي ملك مثلك بنسلن كلهن شيخان=يموت وصيته الطيب يطيب ولايجي زيه
جميلك والله انه في رقبتي دبة الازمان=عليه دين ما أوفيه فيه أبيات شعريه
ترى لك واجبن ماينوفي لو أنحر القعدان=كبيرة واجب وهذي ترى في حقك شويه
عيوني ماتشوفك يالاصيله لابسه فستان=تشوفك في لباس رجال حول الخصر جنبيه
تعلا شانك وأنتي من منول علية شان=تعلا منزلك فوق المجرات السماويه
بفضل الله ثم فضلك نشوف الحق نوره بان=وباتت شمعة الباطل بنور الحق مطفيه
مادام انك بها الدنيا ترانا بحالة اطمئنان=ولن رحتي عن الدنيا عدمتي كل نفسيه
ألا يالله تضربها فرقم اثنين يامنان=عشان تصير بيئتنا من السرقات محميه
صحيح انك تلوميني على هالشكر والعرفان=ولكني بوضح لك بيوتي ليش مبنيه
أنا لي بكرتن سِرقت علاها وسمنا برهان=يمين اعلى ارقبتها دويمع بيمناي مكويه
يظن السارق البكره غفال ولا لها ربان=بصيرن فالبقر بصيرته فالابل معميه
تأثر بالبقر ثم صار مخه ضارب وعطلان=فضح نفسه فضح ربعه كسب من فعلته سيه
نحرها دون تكبيره ولا بسم الله الرحمان=وحيّا باسمه ومعهم مرق فالاكله النيه
تعشوا من فقار ومن سنام وهو عطوه لسان=نزل في منزله ماله بها ذرة أحقيه
بعد شبْعوا ضيوفه دوّموا قالوا عساك اتعان=ودوّمتي له بقولة يعانون الحراميه
تقوى فالبدايه ثم صملتي ثم عظمه لان=وقلتي شفت عبدالله معه إثبات ملكيه
كلامك وقّع فصدره وكنه ذايقن شامان=كسفتي شمسه اللي في سما صيوانكم حيه
من الضلع الموايق قمت ادربل مانشد العربان=لقيت الها جنوب الطايف المصياف ماريه
كلوها جوف ديرتهم ونا من روّحت جوعان=لقيت عظامها واحشاءها والجلد مرميه
وخصمي ماهم بحرّث ولا من ربعي العتبان=ولاهم من ثقيف ولاني مسبب حزازيه
ونا خلفي جيوشن تودع جبال العدا قيعان=ولكن قبل اقومها طرقت ابواب وديه
وعندي بينه والخصم مايقبل منه حلفان=وسوم الاسعدي من جلدها ماهي بممحيه
انا قدمت ماعندي وضيفانه شهود اعيان=وقلتي خابره إنك لحقك ناوي الجيه
ورحبتي وهليتي وامرتي بدلة الرسلان=وقلتي ماتروح الا بعد عازتك مقضيه
وحولتي معاملتي لمنهم للعدل ميزان=يقولون الشيوخ الحق لك ميه على ميه
بعد بحثي عرفت انه زميل بحسبة الاخوان=زميل الجامعه ماهو زميل الابتدائيه
سترت اسمه مع ايميله على رقمه على العنوان=مهو لجله لجل صداقتن كانت حميميه
توصلنا لصلح وراضين بالصلح وش ماكان=واخذت الغلطه اللي جت من آخوي بحسن نيه
تعذر مني بنفسه ولا عاقبتوا الغلطان=عفيت بطيب نفس وقلت مدموحه ومنسيه
آبا ماعند ربي يابشر ماني لكم ديان=ونا ماني مثل من ينعوض فقضاه بالديه
لكن الثانيه والله لياكلها على الحجان=تبات دياركم من دمه المسفوك مسقيه
على يمناي حطيته واثرني مثل ابن برمان=بعد ماهد طيره جا وطش فحضنه الحيه
وهذي قصتي والوضع من بعد الخيانه شان=ولكن زان وضعي بعد ميقاف السنافيه
وقفتي ماقفن ماياقفه عشره من الشجعان=يبرّد كبد من كبده بصاج الغدر مقليه
طلبتك إعذريني ماقدرت آكمّل النقصان=عجزت اعطيك حقك في قصيده أربعينيه
بقى كلمه أخيره واسمعي ياشيخة الصيوان=لأنك والنعم معطينك اربوعك زعاميه

وسلامتكم ...

شعر / عبدالله بن نور الأسعدي

[فهد الغبين]

عبدالله


الله يعين اللي يتورط فيك ..بحر هايج وموج عالي ..لايطاوله برزخ

لله درك

دمت بود

[إبراهيم الحسان]

السلام عليكم ورحمة الله وبركاته


عبدالله الأسعدي

سأعود إليك هنا يا صقر الشعر .



..
..

تحية

[صنداح الزلامي]

الشاعر القدير عبدالله نور الاسعدي

صح لسانك مدد لا عدد مبدع ياعبدالله وشاعر كبير



حرمنا من فصايدك الجزلة وتواجدك الجميل

[عبدالله بن نور الأسعدي]

المشاركة الأصلية كتبت بواسطة فهد الغبين

عبدالله


الله يعين اللي يتورط فيك ..بحر هايج وموج عالي ..لايطاوله برزخ

لله درك

دمت بود

حياك الله طال عمرك ... وهذا من ذوقك الرفيع

والعالي ... وأرواني مرورك الممطر على صحراء

متصفحي ... ودمت كما تحب ولك مني أبجل تحيه

[عفاف علي]

الشاعر القدير

عبدالله بن نور الأسعدي

سلمت اخوي

دمتَ بـِ سعادة

إحترامي وتقديري لـِ شخصكَ الكريم

[عبدالرحمن صباح الفاضل]

الاسعدي ..

صح لسانكـ ..
قصيدة ممتعه
رغم طولها الا انها ممتعه


لافاض فاكـ

[ناصر بدر الناجي]

شـــــــــــــــاعـــــــــــر كـــــــبــــــــــــيــــــــــر يـــا الاســــــــــــعــــــــــــدي

ماتحتاج شهادتنا بيض الله وجهكـــــ ,,,,,,,,,,, وصح الله لسانكـــــــ ,,,,,,,,,,,,,, تقبل مروري واحترامي / الشاعر ) ناصر بدر الناجي ,,,,,,,,,,,